addysg a sgiliau

addysg a busnes

Ar gyfer economi iach, mae’n hanfodol bod gan addysg gysylltiadau agos â gofynion busnes, ac y gall busnes gael gafael ar y gronfa dalent, cyfleusterau ymchwil ac adnoddau dysgu sydd ar gael.

Mae’r sefydliadau dysgu yn Abertawe’n gweithio gyda busnes yn rhanbarthol, yn genedlaethol ac yn fyd-eang. O gynlluniau lleoliadau i gynnal hyfforddiant staff a chyfleoedd datblygu, i brosiectau ymchwil a throsglwyddo gwybodaeth, mae’r rhanbarth yn annog menter fusnes, gan helpu i greu busnes a thyfu busnes yn y dyfodol.

Mae buddsoddiadau sylweddol gan Brifysgol Abertawe a Phrifysgol Cymru y Drindod Dewi Sant yn creu galluoedd ymchwil a dysgu a chydweithrediad academaidd/diwydiant – gan wella safle Abertawe fel Dinas Arloesedd ymhellach.

mynediad at dalent

A hithau’n gartref i 20,000 o fyfyrwyr, gan gynnwys 2,700 o ôl-raddedigion, mae Prifysgol Abertawe’n cynnig profiad myfyrwyr ardderchog gydag addysgu o’r radd flaenaf. Wedi’i sgorio’n 15fed yn y DU a’r orau yng Nghymru ar gyfer cyflogadwyedd myfyrwyr (HESA 2015), mae dros 80% o fyfyrwyr yn mynd i'r swyddi graddedigion gorau, ac enillodd 76.1% o raddedigion yn 2014-15 radd dosbarth 1af neu 2:1.

Mae Academi Cyflogaeth Abertawe Prifysgol Abertawe’n rhoi mynediad i fusnesau at gronfa helaeth y Brifysgol o fyfyrwyr tra chymwysedig israddedig ac ôl-raddedig ar gyfer lleoliadau gwaith a swyddi. Hefyd, gall cyflogwyr hysbysebu swyddi gwag ar wefan y Brifysgol, cymryd rhan mewn Ffeiriau Gyrfaoedd, Sgyrsiau a Gweithdai, a defnyddio gwasanaeth paru swyddi Gradintel.